Kum 2020 a India Malsuah Bial

-Pauzagin Tonsing====================================

Minute 10 hal zel a lenna in Imphal Lenna phual bawh in, Guwahati leh tuma kum 15 paisa a India Malsuah Bial kichihna mun khawpite ah International Airport ngen a suakta hi. India, Bangladesh, Myanmar, Singapore leh South East Asia gamte kisuktuahna khawpi a hita. Hiai bial tuh "No Man Land" chih minvuah hial in om hi. Kisumdawn tuahna mun poimohtak ahihman in India a company lian taktakte thil bawlkhiakna om kimvek hi. Techno Park leh Info City chihte tuh kum 15 paisa a Hyderabad hiam Bangalore hiam kia a om thei ahihnawnlouhdan a chiang mahmah hi.

Tuabang a Imphal lenna phual tuh gamdang apan lennate'n a bawh zungzung lai un Lenna phual apan in Lamka lam zuan dingte tuh amau gari kizatlou sunte taxi a pai in, nidang a dakkal nih leh a kim taina ah minute 30 kia a taita uhi. Lampite ahih leh National Highway chih mai hilou in Super Highway ahi a, a chi achi in garite tai zingzing mai uhi.

Khantouhna thupitak a tung a, Nagalim a vaihawmtu kikhek in Nagalim mai a Isaac leh Muivah in Naga mite sisan a khek uh kiphinna kipannawn ding in a kisata hi. Himahleh Nagalim tuh khawvel mun tuamtuam apan in tourist tamna pen ahi. Khualzinmiten Nagalim a hun awl zang tam mahmah ua. hiai in Nagalim a khualzin mite tam diakna ahihleh khawvel a kimu sunsun Siroy Lily ziak ahi kha ding.

Tuma kum 15 paisa a Nagaland kichi pen tuni in Nagalim himahleh Mizoram pen in a min ngeimah a pawlai hi. Mizoram in a gammang ua pou mau(bamboo) ziak in khawvel ah minthanna thupitak ngah in, Mautam II nihna a tuah deklai ua Chief Minister Zoramthanga felna ziak in mautam II tuh Mizoram hauhsakna a suak hi. Sum-le-pai dinmun ahoih mahmah hang in a mipite noptalna lam a ngaihpoimoh luat ziak un tuailaite lak ah lam-et-na ding a tawm mahmah hi. Tuaziak in niteng kilawhtawmna leh thil bang kim ah Manipur a apau kinaihpihte uh a lut zungzung ua, semtu tamzaw tuh Manipur a Zo-suante ngen ahita uh.

Tuabang a nidang a India Malsuah Bial kichi mun a khantouhna thupitak a tunlai in Manipur a teng Meitei, Non-Naga leh Naga kichi leng Naga a om nawnlou in Meitei leh Non-Naga kia ahih takman in chi-le-kuang a kikhenna a om nawn kei hi. Non-naga te kichite leng Zo kichi in kimin vekta ua, thukhat-lakhat sat thei in omta uhi. Pau leh ham ah leng, "Hiai pau, huai pau" chi a khenkak theih ahinawnkei. A zat khawm tam luat ziak un paukhat a suakta hi. Meitei pau tuh pau tualleng pen ahi.Numei naupang in amau pau bang in zangthei ua, entertainment tuamtuam ah Meitei pau lou kipawlhlimna tak leng sa nawnlou uh.

Phaizang mite leh singtangmite lak a kideidanna a om nawnlouh bang in inn leh inn, lou leh lou kizom in tengkhawm ta uhi. Lamka khawpi sung a innsawng 10 tunglam teng tuh singtang miten tu ma kum 15 a a luah uh, tuma kum 5 khawng paita a zuak khiak pat ngen uh ahi. Upa lamte'n India leh Naga te kihou lai a lam-et neitak a om thukhawng uh gen in, huailai a pankhawmlouh poidan khawng kihoulimna in a nei uhi. Khangthak lamten tuh politik sang in ekonomik lam a ngai poimoh zaw ua, upa lamte hihkhelhna leng donsak ut nawn vetlou uhi.

Nidang a khut nasep a kilawh phaizang mite tuh tuni a singtangmite ahita. Zo suante tuh chitak, gin-om, hangsan leh kuhkal ahihna uah Lamka khawpi sung a innkong veng, inn a ompih leh mi nasem teng leng Zo suante ahita uh.